Südtiroler Volkspartei

Introduziun

I Ves rengraziun d´avëi vijité la homepage dla SVP por ladin. Le partì popolar de Südtirol (SVP) é n partì che tol ite dötes les tlasses soziales y à na vijiun dl monn umanistich-cristiana. Ara se dà da fà por i dërć dla mendranza todëscia y dla mendranza ladina te Südtirol y por le mantegnimënt de süa cultura. La SVP é la fraziun plü sterscia dl Consëi provinzial de Südtirol olache ara à la maioranza; le Presidënt dla Junta provinziala vëgn dal cërtl dla SVP. Ara é rapresentada sides tles döes ćiamenes dl Parlamënt talian che te chël Europeich.

Aspeć storics

Do la Pröma Vera dl Monn tomâ l´impêr austro-ungarich adöm te n gröm de stać singui. Ala Talia ti êl gnü impormetü Südtirol sce ara foss jüda te vera cun les potënzes dl vest. Tl 1919 gnôl insciö despartì le Tirol da impröma y le tòch plü a süd ti gnô assegné ala Talia. Dal 1921 inant sighitâ tla Talia le rejim fascist nü da tó demez o proibì döt ći che ê todësch, insciö inće i partis politics. Impormò do la Secunda Vera dl Monn se pitâ indô la poscibilité de mëte sö te Südtirol na rapresentanza politica por la mendranza todëscia y por chëra ladina.
Ai 8 de mà 1945 à le comerziant Erich Amonn da Balsan fondè adöm a n grup de porsones dales medemes idees le Partì Popolar de Südtirol cun la stëra de munt sciöche sëgn dl partì. Le partì nü é nasciü dal movimënt de resistënza “Andreas-Hofer-Bund”. Bele ala fin de setëmber dl 1945 compedâ la SVP presciapüch 50.000 componënć. Tl 1946 pro les conferënzes de pêsc de Paris gnôl confermè le tort fat tl 1919 y Südtirol gnô lascè pro la Talia. Mo tl “Tratat de Paris” impormetô la Talia a Südtirol la conzesciun de n´autonomia locala. Tl 1948 aprovâ l´adunanza costituzionala nazionala taliana le pröm Statut de Autonomia por Südtirol; desposiziuns importantes dl tratat de Paris ne gnô nia ademplides. Tl 1957 gnôl tignì la plü gran manifestaziun de protesta tla storia de Südtirol pro le Ćiastel Sigmundskron. Ara ê gnüda organisada dala nöia direziun dl partì sot a Silvius Magnago. 35.000 abitanć de Südtirol cun a će le presidënt dla SVP Silvius Magnago ghirâ n´autonomia independënta por Südtirol y protestâ cuntra la manćianza d´ademplimënt dl tratat de Paris da pert dla Talia. Tl 1960 gnô Silvius Magnago lité sciöche presidënt dla Junta provinziala. Al à governè Südtirol ćina tl 1988. Tres tl ann 1960 portâ l´Austria sön presciun dla SVP la chestiun de Südtirol dan dal´ONU a New York. Al gnô promulghè na ressoluziun che inviâ la Talia y l´Austria a tratatives nöies sön le problem de Südtirol. Cuntra l´indesponibilité dla Talia a dè do manifestâ tl 1961 abitanć dla Provinzia süa malcontentëza y delujiun, tres atentać dinamitars a pilastri dla tenjiun alta. Do tratatives lunges y complicades impröma inanter l´Austria y la Talia y spo inanter i rapresentanć dla SVP y le govern talian en ćiaria gnôl metü adöm n pachet de provedimënć che garantî i dërć de mendranza ai Südtiroleji y ti assigurâ n´autonomia ampla. Do na debata ampla y ćialda gnô chësc “Pachet” aprovè tl 1969 te na sentada provinziala storica straordinara dla SVP arjunjon apëna la maioranza.
Le “Pachet” tolô ite i resultać dles tratatives arjuntes cun indöt 137 provedimënć por na miù proteziun di abitanć dla provinzia. Ai 20 de jenà dl 1972 jô spo en forza le secundo Statut de Autonomia basè sön les competënzes nöies dl “Pachet”.
Da chësc momënt inant metô la provinzia man da florì. Tl 1992 te na sentada provinziala straordinara dla SVP gnô le “Pachet” detlarè sciöche realisé y le strit inanter l´Austria y la Talia gnô aiusté ia dan dal´ONU. N ann do dê fora l´adunanza provinziala dla SVP n program de mascimes nü che tignî cunt dla situaziun nöia y dles sfides desvalies te n´Europa tres plü unida. La intenziun dla SVP resta n majer ampliamënt dl´autonomia te n´Europa federala unida a na manira che l´identité dla mendranza todëscia y de chëra ladina pois gnì conservada inće tl dagnì.

L´autonomia arjunta rapresentëia na fondamënta por n majer svilup de Südtirol. Da 50 agn incà ó la SVP dì stabilité, continuité y competënza por Südtirol, mo ara é sambëgn inće animada da n spirit davert ti confrunć dles reformes nezesciares y ara é por popolarité y vijinanza ai zitadins.


Organisaziun

La SVP à presciapüch 50.000 iscrić. I 293 grups locai é organisà te set zircoscriziuns.

Implü alda pro la SVP les organisaziuns suandëntes:

· le movimënt dles ëres dla SVP
· la generaziun jona tla SVP s´ocupëia di mëmbri dl partì sot ai 30 agn
· la comisciun provinziala por le laûr dla jënt atempada y la solidarieté inanter les generaziuns se dà da fà por i mëmbri dl partì sura i 60 agn
· i comitês soziai dla SVP rapresentëia i lauranć dependënć y les laurantes dependëntes
· i comitês economics dla SVP se crüzia dles ghiranzes dl´economia dl partì
· i comitês dla politica agrara laora fora propostes por na soluziun di problems tl´agricoltöra
· la SVP ladina é la strotöra d´organisaziun por i rapresentanć dla Val Badia y de Gherdëna tla SVP

Estrać fora dal program de mascima dla SVP:

Südtirol y l´Europa

La SVP é por n´Europa dles regiuns unida. Ara se crüzia dl reconescimënt internazional di dërć de mendranza tl cheder di dërć umans y dl ancoraje de chisc tl´UE y tles atres organisaziuns internazionales.

I raporć de Südtirol cun l´Austria

Por secui alalungia é Südtirol stè na pert dla monarchia austriaca. La SVP vëiga le destach dal´Austria do la Pröma Vera dl Monn sciöche n tort storich. N elemënt fondamental dla politica dla SVP é porchël la portignënza mentala y culturala al raiun linguistich todësch y al raiun cultural mitteleuropeich.

Istruziun

N aspet fondamental dla politica d´istruziun é la formaziun linguistica tl lingaz dla uma mo inće tl secundo lingaz y ti lingac foresti.

Natöra y contrada

La natöra y l´agricoltöra é richëzes naturales che dess gnì mantignides inće por les generaziuns che vëgn. Les aziëndes da paur y la strotöra agricola rapresentëia insciö na fondamënta por le mantegnimënt dla cultura popolara. Por la bria particolara de mantignì y curé la contrada él da arjunje n´indenisaziun por les aziëndes da paur.

Familia y ëra

Le matrimone y la familia é la fondamënta de nosta sozieté y se mirita porchël na sconanza particolara. Por na familia cun mituns ne podéssel ester degügn svantaji. Sot a vigni aspet é l´ëra parificada al ël y l´ëra ćiasarina y uma dess gnì reconesciüda sozialmënter avisa sciöche l´ëra che eserzitëia na profesciun.

Iustizia dles generaziuns

La SVP sostëgn la jonëza tl´istruziun y tla formaziun dla jonëza y te so impëgn politich zënza ti tó le dërt da tó dezijiuns. Insciö dess düć avëi a vigni etè na segurëza de basa ecuilibrada.

Economia

La SVP se lascia ite sön n´economia de marćé lëdia cun condiziuns de cornisc tlermënter soziales y ecologiches; laprò alda inće na gran desponibilité. Al é da miré a na garanzia de n´esistënza sigüda y nia a na segurëza de basa a n livel de pecügna.